Në qershor, në më pak se dy javë, mijëra maturantë do të japin provimet e fundit, tri me detyrim e një lëndë që do ta zgjedhin vetë. Ndonëse në kushte pandemie, nuk do të ndiqet e njëjta skemë me vitin e kaluar, ku testi ishte i gjithi me alternativa që do të duhej të plotësoheshin vetëm në dy orë. Matura 2021 rikthen skemën e parapandemisë, ku provimi do të jetë i strukturuar në një pjesë të pyetjeve me alternativa dhe një pjesë me zhvillim. Provimet parashikohen të mbahen nga 3 qershor deri në gjysmë të muajit , ku për çdo katër ditë do të zhvillohet një stestim. Ai nis me gjuhën e huaj, për të vazhduar në 7 qershor me gjuhën amtare e letërsinë, në datën 11 me provimin e matematikës dhe në 15 lënda me zgjedhje. Udhëzimi me datat doli pak ditë pas interpelancës së kërkuar të maturantëve me Ministren e Arsimit, pas paqartësive të krijuara për shkak të pandemisë. Testimet do të kenë tri nivele vështirësie dhe totali i pikëve për të siguruar notën maksimale është 60. Vetëm 20 pyetje do të jenë me alternativa, ndërsa pjesa tjetër me zhvillim. Nuk do të pilotohet më as shkurtim i kohëzgjatjes së provimit, i cili do të rikthehet në dy orë e 30 minuta. I vetmi ndryshim është që, për të marrë notë kaluese nuk do të mjaftojnë më 20% të pikëve, por 25%, bazuar në rregulloren e Maturës Shtetërorë, miratuar në muajin që shkoi. Maturantët kanë përmbyllur procesin e aplikimeve me formularin A1 në kohë rekord, më herët se asnjëherë më parë, që në dhjetor të vitit që shkoi. Aty kanë shënuar një nga katër gjuhët e huaja ku do të testojnë njohuritë. Sezoni nis herët këtë vit me synim mbylljen e vlerësimeve brenda muajit qershor, për të mos penalizuar sigurimin e diplomës për ata që duan t’u besojnë të ardhmen e tyre universiteteve të huaja. Si asnjë vit më parë, pandemia la në Shqipëri qindra të rinj që kishin menduar që në krye të herës të kryenin arsimin e lartë jashtë vendit. Kjo solli ezaurimin e kuotave në degë të shumëkërkuara që në fazat e para të raundit të parë. Ministria ka premtuar se për maturantët që duan të studiojnë jashtë të realizojë brenda datës 15 korrik diplomat e tyre, ndërsa rezultatet e provimeve brenda muajit qershor.