Fushata elektorale nuk ka nisur zyrtarisht dhe partitë politike ende nuk kanë dalë me emrat e kandidatëve, por ajo që dihet me siguri absolute janë të parët në lista në 12 qarqet e vendit, pasi deri më tani janë konsideruar edhe si drejtuesit politikë të partive . Tashmë, forcat kryesore politike, PS dhe PD kanë zyrtarizuar të gjithë emrat e drejtuesve politikë në 12 qarqe dhe beteja po zhvillohet në terren, duke konfirmuar se ata do të jenë të parët e kandidatëve. Përballja më e fortë do të jetë në Tiranë, ku PD ka zyrtarizuar si drejtues të fushatës Grida Dumën, Jorida Tabakun, Flamur Nokën, Aldo Bumçin, Alfred Rushajn, Belind Këlliçin, Albana Vokshin dhe Agron Shehajn. Ndërkohë që socialistët ja kanë besuar drejtimin e fushatës Erion Veliajt, Elisa Spiropalit dhe Ervin Bushatit. Përballje interesante do jetë edhe në Elbasan mes Taulant Ballës dhe Gazmend Bardhit. Fushata e Partisë Socialiste në Durrës do të drejtohet nga Ardian Çela, ndërsa blutë kanë caktuar nënkryetarin Edi Paloka. Në Lezhë përplasen dy kandidatura të forta si Lindita Nikolla dhe pedagogu Mark Marku. Në Shkodër, socialistët kanë zgjedhur Ilir Beqajn, ndërsa Partia Demokratike, Helidon Bushatin. Një tjetër rivalitet do të ketë në qarkun e Dibrës, ku përballë Olta Xhackës nga Partia Socialiste, demokratët kanë caktuar si koordinator, ish-kryebashkian e Kamzës, Xhelal Mziu. Në Vlorë, Damian Gjiknuri ka si rival të demokratëve në cilësinë koordinatorit Bujar Leskan, ndërsa në Gjirokastër Tritan Shehu rikthehet, në përballjen me Bledi Cucin e socialistëve. Një tjetër përballje interesante është edhe ajo mes Bledi Klosit të socialiste dhe Tomorr Alizotit të demokratëve në qarkun e Beratit.