Ndonëse zyrtarisht nuk është në axhendën e samitit të Bashkimit Evropian, procesi i zgjerimit pritet të diskutohet në margjinat e samitit dy ditor ne Bruksel. Këtë e pohuan burime diplomatike të cilat presin që kancelarja gjermane, Angela Merkel – vendi i së cilës e përfundon në 31 dhjetor kryesimin e presidencës së BE-së – të angazhohet personalisht në takime bilaterale me disa kolegë nga shtetet e tjera, me qëllimin që të zhbllokohen vendimet e lidhura me procesin e zgjerimit. Bllokimi kryesor është ai që Bullgaria i ka bërë kornizës negociuese për Maqedoninë e Veriut. Burimet diplomatike thonë se presidenca gjermane ende po i mban të hapura tre opsione. I pari është miratimi i përfundimeve për procesin e zgjerimit dhe atë të stabilizim-asocimit si dhe miratimi i dy kornizave negociuese: për Maqedoninë e Veriut dhe Shqipërinë. Mundësia e dytë, sipas burimeve, është miratimi vetëm i konkluzuioneve të Këshillit të BE-së. Opsioni I tretë, për të cilin besohet se ka më pak gjasa të ndodhë, është miratimi i konkluzioneve të zgjerimit për të dy vendet, ndërsa korniza negociuese t’i jepet vetëm Shqipërisë. Shumë shtete e kundërshtojnë këtë ide, që vetëm Shqipëria të përparojë në anëtarësimin në BE, pasi konsiderohet se ajo ende duhet të plotësojë para nisjes së negociatave të anëtarësimit. Burimet diplomatike në Bruksel thonë se përshkallëzimi i retorikës mes Maqedonisë së Veriut dhe Bullgarisë ditëve të fundit, i ka dëmtuar edhe më shumë gjasat që të arrihet sukses.