Kërkimi për një jetë jashtëtokësore ka hyrë në një fazë të re premtuese. Sipas një studimi të ri të botuar në revistën “Nature”, roboti i dërguar nga NASA në Mars ka zbuluar molekula karboni dhe minerale që në Tokë lidhen shpesh me mjedise mikrobike. Zbulimi është bërë në Kraterin Jezero, një zonë që dikur besohet të ketë qenë liqen. Mostrat e mbledhura përmbajnë substanca si vivianiti, mineral që në Tokë ndodhet në mjedise ku ka ose ka pasur jetë mikroskopike. Shkencëtarët nuk thonë ende që kemi gjetur jetë dhe janë të kujdesshëm në deklarata, por po flasin për “bio-shenja të mundshme”. Në fjalë të tjera: këto janë gjurmë që mund të kenë origjinë biologjike. Një nga pjesët më interesante të zbulimit është se këto struktura përmbajnë karbon të kombinuar me minerale, një kombinim që në Tokë është tipik për vendet ku kanë jetuar mikrobe. Shkencëtarët kanë identifikuar edhe formacione të çuditshme që i quajtën “fara lulekuqeje” dhe “njolla leopardi”, për shkak të formës që kanë nën mikroskop. Për herë të parë, kemi një kombinim të molekulave dhe mineraleve në Mars që nuk përjashton jetën si shpjegim. A është kjo prova që nuk jemi vetëm në univers? Jo ende. Por është një hap i rëndësishëm drejt përgjigjes që njerëzimi ka kërkuar për shekuj.