Bektashizmi shqiptar dhe ai botëror këtë të dielë shënuan një datë historike, atë të 100 vjetorit të mbajtjes së Kongresit të parë Bektashian, që konsolidoi më tej organizimin strukturor e përhapjen e këtij besimi të paqtë, deviza e të cilit ka qenë e mbetet që prej tetë shekujsh nga lindja e në vazhdim, “Pa atdhe, nuk ka fe!“. Në ceremoni mori pjesë edhe presidenti Ilir Meta, që e vuri theksin tek zbatimi i detyrave kushtetuese, një prej të cilave kthimi i pronave. “Edhe pas 30 viteve nga rënia e regjimit ende jo vetëm bësimi bektashian, por edhe të tjerë kanë pengesa për të funksionuar në mënyrë më efikase pranë besimtarëve të tyre. Është koha që shteti dhe të gjitha institucionet të zbatojnë të drejtat kushtetuese të besimeve duke filluar nga kthimi i pronave dhe duke vazhduar me mbështetjen që ato meritojnë”. Kongresi i parë bektashian është mbajtur nga 14 deri në 17 janar të vitit 1921 në Prishtë të Skraparit, atje ku dhe u hodhën themelet e funksionimit të këtij komuniteti. Kryegjyshi Haxhi Dede Edmond Brahimaj, tha se bektashinjtë shënuan dhe dhanë edhe jetën për atdheun.