Altin Dumani është prokurori që drejtoi operacionin e SPAK që vuri në pranga gjyqtaren Enkeleda Hoxha dhe nëntë persona të tjerë. Dumani ka drejtuar i vetëm të gjithë operacionin që shkatërroi grupin e strukturuar në Gjykatën e Krujës, të cilët po bëheshin gati të lironin një tjetër të dënuar dhe pikërisht Saimir Petanin. Dumani ka lindur në Dibër. Ai vjen nga radhët e Prokurorisë së Apelit njihet si prokurori që ka drejtuar i i pari njësinë Task Forcë, për të luftuar krimin e jakave të bardha (siç njihen ndryshe zyrtarët e nivelit të lartë). Altin Dumani e ka nisur karrierën në vitin 1999 në Sarandë dhe është një prej prokurorëve të SPAK. Dumani është një nga prokurorët e vetëm që la “pa fjalë” edhe të dërguarin (vëzhguesin) e Operacionit Ndërkombëtar të Monitorimit, Theo Jacobs, ditën që doli përpara Komisionit të Pavarur të Kualifikimit. “Kam marrë pjesë në 25 çështje dhe kjo është hera e parë që s’kam asnjë pyetje. Zoti Dumani qenka me fat”, u shpreh Jacobs në atë kohë. Dumani bëri bujë me qëndrimin e akullt që mbajti gjatë gjykimit të 29 të pandehurve të Gërdecit dhe 3 dënimet e përjetshme që kërkoi për tre nga të pandehurit kryesorë të tragjedisë së 15 marsit 2008. Dumani është prokurori, që ka kaluar mbi 4 mijë dosje nën hetim dhe madje, nuk janë të pakta rastet kur është përballur me kërcënime të forta. Eshtë një prej atyre prokurorëve që ka qenë i mbrojtur për 9 vjet nga Policia e shtetit, pikërisht për shkak të kërcënimeve të vazhdueshme që merrte për shkak të detyrës.