Profesionistët e lirë, të cilët paguan këstin e parë të tatimit i cili më pas u shfuqizua nga Kushtetuesja, nuk kanë ende asnjë komunikim zyrtar nëse pagesa e kryer do u njihet si tepricë kreditore. Deputetja e Partisë Demokratike, Jorida Tabaku i bën thirrje qeverisë që të ndjekë praktikën e Covid 19 dhe t’u kthejë shumë tatimore të paguar. Facebook Tabaku: “I takon qeverisë që të ngrihet në lartësinë e mbrojtjes së interesave të qytetarëve duke vepruar me shpejtësi dhe drejtësi ndaj atyre që padrejtësisht u ka marrë mbi 10 milionë euro taksa nga xhepi i tyre. Duhet t’ia rikthejë ato miliona euro nga xhepi i Profesionistëve të Lirë përmes një vendimi të thjeshtë të qeverisë, njësoj siç u veprua gjatë pandemisë COVID-19. Kaq do të mjaftonte që sot në xhepat e 10 mijë profesionistëve të lirë të riktheheshin 10 milionë euro, një shumë e papërfillshme për buxhetin, por që është shumëçka për portofolin e shtresës së mesme dhe buxhetin e familjeve të tyre.”