Procesi I vaksinimit që filloi një ditë më parë vazhdon edhe sot sërish me personelin mjekësor. Në stadiumin ‘Air Albania’, që është shndërruar në një qendër të madhe shëndetësore, pritet të vaksinohen rreth 50-60 ‘bluza të bardha’, të cilët janë në vijën e parë përballë këtij virusi. Pasi të ketë përfunduar personeli mjekësor rradhën e kanë policët dhe të moshuarit mbi 75-vjeç. Të gjithë personat që do të vaksinohen I nënshtrohen një procesi që ndiqet nga një protokoll rigoroz. Para vaksinimit, qytetari duhet të plotësojë një formular ky duhet të përgjigjet lidhur me disa pyetje, bashkangjitur së cilës ka edhe disa informacione shtesë lidhur me vaksinën. Më pas ai merr dozën e parë. Pas marrjes së vaksinës është e detyrueshme që i vaksinuari të qëndrojë në ambientet e stadiumit për rreth 30 minuta në monitorim nga ana e bluzave të bardha. Më pas I vaksinuari duhet të kthehet pas 21 ditësh për të marrë dozën e dytë, pa marrjen e së cilës vaksina nuk ka efektin që pritet. E para që bëri vaksinën ditën e djeshme ishte Shefja e Infektivit, Najada Çomo, për t’u ndjekur nga kryeministri Edi Rama dhe mjekët Pëllumb Pipero dhe Tritan Kalo.