Aksi rrugor Vlorë-Orikum vazhdon të ketë probleme. Këtë të hënë në mëngjes rruga ka rënë dhe lëvizja e mjeteve kalohet në një aks. Në aksin nacional Vlorë – Orikum në vendin e quajtur Zhiron, 7 km nga qyteti i Vlorës , rruga ka nisur të çahet prej disa ditësh në një pjesë të shtratit të saj menjëherë pas reshjeve të fundit. Kjo rrugë është kontraktuar për 13.7 milionë euro që të mirëmbahet nga kompania “Salillari”. Punonjësit e kompanisë “Salillari” tentuan “ta rregullojnë” duke hedhur zhavorr dhe beton në kanalin e sapo hapur të rrugës së çarë por nuk funksionoi . Brenda pak ditëve, kjo është problematika e dytë që ndodh me këtë aks nacional që duhet të mirëmbahet nga kompania “Salillari”. Për pesë vite ajo është paguar me 13.7 milionë euro për të mos lejuar të ndodhnin shembje të tilla. Por si në Borsh, ashtu edhe në vendin e quajtur Zhiron, shembjet ndodhën. Paratë janë shpenzuar, ndërsa puna nuk është kryer. Kontrolli i Lartëi Shtetit ndërkohë ka nisur një hetim në lidhje me këtë kompani te cilës edhe me herët rrugët i janë shembur.