Hartimi i Kodit të Ri Penal nuk është konsultuar me protagonistët e sistemit të drejtësisë. Kreu i SPAK, Altin Dumani deklaroi se drafti nuk u ka mbërritur ende zyrtarisht dhe se do të analizohet sapo t’u komunikohet. Prokuroria e Posaçme nuk është përfshirë në draftimin e kodit të ri penal dhe sipas Dumanit fillimisht duhej të ishite bërë një diskutim, nëse ishte i nevojshëm apo jo një kod i ri penal. “Është një draft, ne se kemi marrë zyrtarisht, nuk jemi përfshirë në hartimin e tij, kur të na vijë do e analizojme dhe do mbajmë një qëndrim.” – deklaroi Altin Dumani. Më herët edhe kryeprokurori, Olsian Çela deklaroi se Prokuroria e Përgjithshme nuk ka qenë pjesë e grupit të punës, duke shtuar se mënyra e formulimit të veprave penale shfaq një tendencë represive që rrit potencialin e kriminalizimit të individit në shoqëri e që sjell pasoja të rëndësishme në jetën e qytetarëve. Gjatë prezantimit të projekt-kodit penal, kryetari i Gjykatës së Lartë po ashtu deklaroi se institucionit që ai drejton nuk i ishte vënë në dispozicion drafti, ndërkohë kryetarja e Gjykatës Kushtetuese, Holta Zaçaj pati një gjuhë më diplomatike në fjalën e mbajtur gjatë prezanimit të kodit të ri penal.