Komisioni i Pavarur i Kualifikimit ka shkarkuar gjyqtarin e Gjykatës Administrative të Apelit, Bari Shyti. Vendimi u dha pasi dy ditë më parë u zhvillua seanca e përballjes në KPK me gjyqtarin. Gjatë kësaj seance ai u përball me raporte negative të vlerësimit për sa i përket 3 shtylla kryesore, pasurisë, integritetit të figurës dhe profesionalizmit. Relatorja Firdes Shuli tha se trupa e me kryesuese Genta Tafa (Bungo) dhe anëtare Suela Zhegu, kishte përfunduar një herë hetimet ndaj Shytit vetëm në kriterin e pasurisë, por më pas kishte riçelur hetimin në të tre kriteret. Sipas realtores Firdes Shuli, në fund gjyqtari Bari Shyti rezultonte me bilanc negativ me 8.6 milionë lekë dhe kishte raport negativ nga Drejtoria e Sigurimit të Informacionit të Klasifikuar. Shyti u përball në hyrje të Pallatit të Kongreseve ku zhvillohen seancat e KPK me një grup protestuesish që kërkonin shkarkimin e tij dhe e akuzonin për korrupsion. Megjithatë, ai këmbënguli që KPK të merrte në konsideratë shpjegimet e tij. Bari Shyti e ka nisur karrierën në sistemin e drejtësisë në vitin 1993 dhe ka punuar si gjyqtar në Gjykatat e Bulqizës dhe atë të Dibrës. Në vitin 2013, ai u dekretua si gjyqtar në Gjykatën Administrative të Durrësit dhe prej vitit 2016 e ushtron funksionin në Gjykatën Administrative të Apelit.