Presidenti rus, Vladimir Putin uroi Joe Bidenin për fitoren në zgjedhjet presidenciale të 3 nëntorit, pas konfirmimit të rezultatit nga kolegji zgjedhor, duke thënë se shpreson që Rusia dhe Shtetet e Bashkuara do të hedhin pas krahësh dallimet e tyre për të promovuar sigurinë globale, transmeton agjencia e lajmeve. Sipas një komunikate të Kremlinit, Putin i ka uruar sukses Bidenit dhe ka thënë se “sa më përket mua, unë jam gati të bashkëpunoj dhe kontaktoj me ju”. Presidenti rus është një ndër liderët e fundit të shteteve të mëdha në botë që nuk ka uruar presidentin e zgjedhur të SHBA-së deri më tani. Zyrtarët në Moskë, duke përfshirë shefin shtetëror për zgjedhje, kanë kritikuar më herët procesin zgjedhor në SHBA, duke e përshkruar si arkaik dhe si jopërfaqësues të vullnetit të popullit. Në telegramin e urimit për Bidenin, Putin ka thënë se vendet e tyre “kanë përgjegjësi për siguri globale dhe stabilitet”. Biden pritet të ketë qasje më të ashpër kundër Rusisë, sesa presidenti amerikan, Donald Trump, të cilin e ka kritikuar gjatë fushatës zgjedhore për “afrim me shumë autokratë në botë, duke nisur nga Vladimir Putin”. Rusia është akuzuar për ndërhyrje në zgjedhjet amerikane të vitit 2016, në të mirë të fitores së Trumpit, me shpresën se ai do të kishte qasje më të butë ndaj Moskës.