Ukraina dhe aleatët e saj perëndimorë po diskutojnë një kompromis të mundshëm sipas të cilit Kievi mund të fitojë anëtarësimin në NATO në këmbim të një zgjidhjeje diplomatike për çështjen e territoreve të pushtuara nga Rusia në të ardhmen. Financial Timesm në një artikull të saj, thekson se strategjia e re që Presidenti Volodymyr Zelensky prezantoi para udhëheqësve amerikanë javën e kaluar kishte në thelb ndihmën e aleatëve që Kievi të forcojnë pozicionin e tij ushtarakisht dhe diplomatikisht, për ta detyruar Rusinë të ulet në tryezën e bisedimeve. Diplomatët perëndimorë dhe zyrtarët ukrainas janë të prirur të besojnë se garancitë domethënëse të sigurisë mund të formojnë bazën e një zgjidhjeje të negociuar në të cilën Rusia do të mbajë de facto, por jo de jure, kontrollin mbi të gjithë ose një pjesë të territorit ukrainas që aktualisht ka pushtuar. As Kievi dhe as mbështetësit e tij nuk propozojnë të njohin sovranitetin e Rusisë mbi pjesën e territorit ukrainas të okupuar ilegalisht që nga viti 2014. Njohja e këtij fakti do të inkurajonte agresionin e mëtejshëm rus dhe do të minonte seriozisht rendin juridik ndërkombëtar. Në vend të kësaj, ka një marrëveshje të heshtur që këto toka duhet të kthehen diplomatikisht në të ardhmen. Megjithatë, edhe kjo është një çështje e ndjeshme për ukrainasit, veçanërisht kur paraqitet si bazë për kompromis me Moskën. Ajo që po diskutohet më hapur është natyra dhe koha e garancive të sigurisë që Ukraina duhet të marrë për të mbështetur zgjidhjen. Në Uashington, Zelensky përsëriti qëndrimin e tij për anëtarësimin e shpejtë në NATO. Shtetet e Bashkuara kanë frikë ta sjellin Ukrainën nën ombrellën e Nenit 5 të Traktatit të NATO-s derisa të përfundojë lufta. Megjithatë, disa nga aleatët e Ukrainës sugjerojnë se një opsion i tillë mund të jetë ende realist. Ish sekretari i përgjithshëm i NATO-s, Jens Stoltenberg, ka kujtuar se garancitë e sigurisë që Shtetet e Bashkuara i japin Japonisë nuk shtrihen në Ishujt Kuril, katër prej të cilëve Japonia i konsideron të vetët por ata kontrollohen nga Rusia që kur Bashkimi Sovjetik i aneksoi në 1945. Ai përmendi edhe shembullin e Gjermanisë, e cila u bashkua me NATO-n në vitin 1955, pavarësisht se vendi ishte i ndarë. Vetëm Gjermania Perëndimore mbrohej nga NATO. Modeli i Gjermanisë Perëndimore për Ukrainën është diskutuar në qarqet e politikës së jashtme për më shumë se 18 muaj. Tani ideja po merr më shumë vrull. Shumica e mbështetësve e pranojnë se Moskës nuk do t'i pëlqente ideja, ndërsa skeptikët kanë frikë se ajo mund të provokojë një përshkallëzim. Anëtarësimi në NATO do të garantonte sovranitetin e Ukrainës dhe do ta lejonte atë të vazhdojë orientimin e saj perëndimor, synime që lideri rus Vladimir Putin është i vendosur t'i kundërshtojë.