Një analizë e fundit, e mbështetur mbi të dhënat satelitore të dy dekadave të fundit, zbulon se pjesë të mëdha të rezervave ujore të Evropës po thahen. Po ashtu, studimi zbulon se edhe rezervat e ujërave të ëmbla po tkurren në të gjithë Evropën jugore dhe qendrore, nga Spanja e Italian, në Poloni dhe pjesë të Mbretërisë së Bashkuar. Shkencëtarët evropianë analizuan të dhënat e viteve 2002-2024 nga satelitët, të cilët gjurmojnë ndryshimet në fushën gravitacionale të Tokës. Gjetjet zbulojnë një çekuilibër të fortë: veriu dhe veriperëndimi i Evropës, veçanërisht Gadishulli Skandinav, pjesë të Mbretërisë së Bashkuar dhe Portugalia, janë bërë më të lagështa, ndërsa pjesë të mëdha të jugut dhe juglindjes, përfshirë pjesë të Mbretërisë së Bashkuar, Spanjës, Italisë, Francës, Zvicrës, Gjermanisë, Rumanisë dhe Ukrainës, janë tharë. “Kjo duhet të jetë një "thirrje zgjimi" për politikanët që janë ende skeptikë për uljen e emetimeve. Nuk po flasim më për kufizimin e ngrohjes në 1.5 gradë Celsius, ka të ngjarë të shkojmë drejt 2 gradë Celsius mbi nivelet para-industriale dhe tani po dëshmojmë pasojat”, thanë shkencëtarët, duke shtuar se “Po shohim reshje më të dendura shiu dhe periudha më të gjata thatësire”. Agjencia e Mjedisit ka paralajmëruar Anglinë të përgatitet për thatësirë që do të vazhdojë deri në vitin 2026. “Pranverën dhe verën e ardhshme, nëse nuk marrim reshjet që na nevojiten, do të ketë pasoja të rënda në Angli. Do të përballemi me kufizime të rënda të ujit dhe kjo do ta bëjë jetën e të gjithëve shumë të vështirë”, u shprehën shkencëtarët e studimit.