E ndërsa një pjesë e tokës po përballet me thatësirën, pjesa tjetër po vuan nga shirat katastrofikë. Në Azinë Jugore raportohet për të paktën 600 persona të vdekur nga shirat e rrëmbyeshëm, që kanë shkaktuar përmbytje dhe rrëshqitje të tokës. Situata e përkeqësua nga stuhitë tropikale, që shkaktuan përmbytjet më të mëdha ndër vite, duke prekur me miliona njerëz në Indonezi, Malajzi, Tajlandë dhe Sri Lanka. Reshjet masive të shiut filluan të mërkurën, duke përmbytur e zhdukur gjithçka. "Doja të shpëtoja rrobat e mia, por shtëpia ime u shemb”, tregon një banor. Ndërkohë, me qindra njerëz rezultojnë ende të zhdukur, ndaj numri i të vdekurve ka të ngjarë të rritet. Mijëra të tjerë mbeten të bllokuar, ndërsa disa presin mbi çatitë e shtëpive, që të shpëtohen. Mbi 300 viktima u regjistruan në Indonezi, 160 në Tajlandë. Viktima u shënuan edhe në Malajzi, ndërsa në Sri Lanka, e cila u godit nga cikloni, mbi 130 persona kanë vdekur dhe rreth 170 të tjerë rezultojnë të zhdukur. Cikoni i jashtëzakonshëm që goditi vendin shkaktoi rrëshqitje katastrofike të dheut dhe përmbytje masive, duke shkatërruar totalisht me mijëra ndërtesa. "Rryma ishte shumë e shpejtë, brenda pak sekondash arriti në rrugë, hyri në shtëpi", tregoi një banor tjetër. Moti i keq ka penguar operacionet e shpëtimit dhe, ndërsa dhjetëra mijëra njerëz janë evakuuar, qindra të tjerë janë ende të bllokuar, tha agjencia indoneziane e fatkeqësive.