Gjykata Kushtetuese rrëzoi padinë e bërë nga ana e deputetëve të PD për portin e ri të Durrësit. Me shumicë votash Kushtetuesja hodhi poshtë të gjitha pretendimet e ngritura nga ana e ligjvënësve të opozitës të cilët kërkonin shfuqizimin e ligjit në lidhje me projektin e investimit strategjik. “Për sa u takon pretendimeve të kërkuesve për antikushtetutshmërinë e katër VKM-ve, përkundrejt standardeve përkatëse të jurisprudencës kushtetuese, Gjykata, me shumicë votash, arriti në përfundimin se ato (VKM-të) janë akte individuale dhe si të tilla nuk i nënshtrohen juridiksionit kushtetues në bazë të nenit 131, pika 1 (c) të Kushtetutës.”, argumenton Kushtetuesja e cila pasi vlerësoi pretendimet e kërkuesit për cenimin e identitetit dhe trashëgimisë kulturore, të drejtës së transparencës, shpenzimeve financiare, ttë marrëveshjes me BE për skemën e pasaportave të arta por dhe autonomisë vendore, vendosi të mos I marrë parasysh pasi kërkuesi sipas trupës së gjyqtarëve, nuk ka paraqitur argumente kushtetuese.