Tajvani nisi të mërkurën stërvitjet e tij më të mëdha ushtarake, që përfshijnë edhe sulme të simuluara ndaj sistemeve të komandës dhe infrastrukturës përpara një pushtimi kinez, thanë zyrtarë të lartë të mbrojtjes. Fazat e hershme të stërvitjeve vjetore Han Kuang do të përqendrohen në testimin se si ushtria e Tajvanit mund të decentralizojë komandën në rast të një sulmi shkatërrues mbi sistemin e komunikimit. Gjatë 10 ditëve të ardhshme, stërvitjet do të zgjerohen për të vlerësuar gatishmërinë luftarake të Tajvanit kundër një përpjekjeje në shkallë të plotë për të pushtuar ishullin. "Po mësojmë nga situata në Ukrainë në vitet e fundit dhe po mendojmë realisht për atë që mund ta presë Tajvanin... në luftime të vërteta", tha një zyrtar i lartë i mbrojtjes, duke theksuar nevojën për të mbrojtur sistemet e komandës dhe të komunikimit. Në stërvitjet e përvitshme këtë vit do të mobilizohet edhe numri më i madh i rezervistëve, rreth 22,000, dhe për herë të parë do të përdoren edhe sistemet e reja të Raketave të Artilerisë me Lëvizshmëri të Lartë, ose HIMARS, të prodhuara nga Lockheed Martin, së bashku me raketat tokë-ajër Sky Sëord të prodhuara nga Tajvani. Kina e sheh Tajvanin e qeverisur në mënyrë demokratike si të vetin dhe ka intensifikuar presionin ushtarak rreth ishullit gjatë pesë viteve të fundit, duke përfshirë një sërë lojërash lufte dhe patrullime të përditshme. Pekini nuk ka hequr dorë kurrë nga mundësia e përdorimit të forcës për ta vënë ishullin nën kontrollin e tij, dhe çdo sulm ndaj Tajvanit mund të ndezë një luftë më të gjerë rajonale. Zyrtarët tajvanezë të mbrojtjes thanë se besonin se ushtria kineze do t'i monitoronte nga afër stërvitjet.