Një tjetër rast i kultivimit të lëndëve narkotike është zbuluar në kuadër të operacionit antidrogë të koduar “Koordinata”. Këtë herë policia ka zhvilluar aksionin në Fier, ku në pranga kanë rënë dy persona të cilët u kapën duke u kujdesur për bimët narkotike. Operacioni u zhvillua gjatë natës në fshatin Rreth Libofshë të Fierit, ku u evidentuan dy parcela toke publike, ku ishin kultivuar 284 bimë narkotike të llojit kanabis sativa. Të dy të arrestuarit akuzohen për veprën penale “Kultivimi i bimëve narkotike, kryer në bashkëpunim”. Bimët narkotike u asgjësuan në vendngjarje, ndërsa hetimet dhe kontrollet vijojnë për të zbuluar të përfshirë të tjerë në këtë aktivitet të paligjshëm.