Shërbimet e Policisë Kufitare Sarandë kanë finalizuar operacionin e koduar ‘Distanca’, duke goditur një rast të dhënies ndihmë për kalim të paligjshëm të kufijve. Në pranga ka përfunduar 27 vjeçari Erind Yzeiraj. Ai u kap në flagrancë në fshatin Xarrë, duke transportuar me automjet 13 emigrantë nga Egjipti kundrejt pagesës, të cilët kishin hyrë ilegalisht në Shqipëri dhe synonin të kalonin në vendet e BE-së. Nga hetimet dyshohet se këta shtetas kanë hyrë ilegalisht në Shqipëri, nga kufiri me Greqinë, dhe synonin të kalonin ilegalisht në vendet e tjera të BE-së. Policia ka sekuestruar në cilësinë e provës materiale, automjetin me të cilin transportoheshin emigrantët. Autoritetet njoftojnë se hetimet vijojnë dhe se po punohet për identifikimin e shtetasve të tjerë që mund të jenë të përfshirë. Materialet procedurale iu referuan Prokurorisë së Sarandës, për veprën penale “Ndihma për kalim të paligjshëm të kufijve”.