Mbi 10 mijë e 200 zyrtarë publikë në Kosovë kanë deklaruar pasurinë e tyre brenda afatit ligjor për vitin kalendarik 2025, ndërsa rreth 140 të tjerë nuk e kanë përmbushur këtë detyrim, ka bërë me dije Agjencia për Parandalimin e Korrupsionit. Agjencia ka theksuar procesi i deklarimit të rregullt vjetor të pasurisë është zhvilluar në përputhje me afatet e përcaktuara ligjore, nga 1 mars në 31 mars 2026. Sipas APK, bazuar në të dhënat e dala nga sistemi më 1 prill, rezultojnë rreth 140 zyrtarë që nuk e kanë përmbushur detyrimin ligjor, ndërsa ka theksuar se nuk do të ketë shtyrje të afatit për deklarim. Sa i përket masave ndëshkuese, Agjencia theksoi se në përputhje me kompetencat e saj ligjore, tashmë ka filluar ndërmarrjen e veprimeve përkatëse ndaj zyrtarëve që nuk e kanë përmbushur detyrimin në afat, duke përfshirë inicimin e procedurave për shqiptimin e gjobave. Sipas APK, gjoba në vlerë prej 30% të pagës mujore aplikohet për të gjithë zyrtarët që nuk kanë respektuar afatin ligjor. Në rast se detyrimi nuk përmbushet as pas masave administrative, Agjencia paralajmëron se pas 15 ditësh do merren hapa ligjore deri në burgim 6 muaj deri në 5 vite, si dhe konfiskim të pasurisë së fituar në kundërshtim me ligjin.