Deklarata individuale e të ardhurave është dorëzuar nga 90 për qind e individëve që e kishin këtë detyrim. Pas uljes së pragut të deklarimit nga 2 milionë në 1.2 milionë lekë, numri i deklaruesve është rritur krahasuar me një vit më parë. Sipas të dhënave të drejtorisë së përgjithshme të tatimeve, rreth 127 mijë nga 143 mijë individë dorëzuan deklaratën individuale të të ardhurave që kanë realizuar në vitin 2024, në sistemin e filling. Ndërkohë një vit më parë, këtë detyrim e kishin rreth 74 mijë individë dhe e dorëzuan brenda afatit rreth 66 mijë qytetarë. Këtë vit, afati për dorëzimin e DIVA-s u shty deri më 1 prill, për shkak se fundi i marsit përkoi me festën zyrtare të Fiter Bajramit. Megjithatë ka ende qytetarë që nuk e kanë dorëzuar deklaratën e të ardhurave dhe administrata tatimore bën thirrje që ta përmbyllin sa më shpejt këtë proces për të shmangur gjobat dhe interesat. Detyrimin për të depozituar deklaratën individuale e kanë edhe ata të cilët kanë fituar nga platformat online si Facebook, Youtube dhe Instagram. Sipas verifikimeve që janë kryer me bankat ka rezultuar se në total ka pasur 33 milionë euro të ardhura për qytetarët nga këto platforma.