Pas kaosit që shpërtheu këtë të martë në seancën e Kuvendit të Serbisë, ku deputetët e qeverisë dhe opozitës u përplasën pas hedhjes së tymueseve, Prokuroria e Parë Themelore ka reaguar përmes një deklarate. Organi i akuzës bën me dije se ka dërguar një kërkesë për mbledhjen e informacionit të nevojshëm dhe se ka urdhëruar autoritetet policore të verifikojnë faktet, në mënyrë që të mblidhen provat për të identifikuar ata që sollën dhe përdorën mjetet piroteknike. Sakaq njofton se do të hetohen dhe zbulohen mënyrat se si këto mjete piroteknike dhe tymuese u futen në ambjentet e Kuvendit. Pavarësisht situatës kaotike që u krijua në Kuvend, kryetarja Ana Brnabiç vazhdoi të drejtonte seancën, ndërsa deputetët dhe ministrat po përplaseshin me njëri-tjetrin. Sakaq ajo ka akuzuar opozitën se po vepron si “bandë terroriste”. Pas miratimit të rendit të ditës nga deputetët e koalicionit qeveritar, i cili u kundërshtua ashpër nga opozita, deputetët e kësaj të fundit hodhën në dy raste tymuese.