Marklen Haka, një emër i njohur për drejtësinë shqiptare, është arrestuar në Dubai. Bëhet me dije se Policisë së Shtetit i ka ardhur një informacion nga Dubai për ndalimin e një personi që dyshohet se është Marklen Haka. Pas këtij informacioni autoritetet shqiptare u kanë nisur homologëve në Dubai të dhënat e Hakës, për të parë nëse është i njëjti person. Marklen Haka është shpallur në kërkim për dosjen “Revanshi” nga SPAK pasi akuzohet për vrasje të mbetur në tentativë, pjesëmarrje në grup kriminal dhe armëmbajtje pa leje. Ai është një nga anëtarët e bandës së Niklës, emri i të cilit rezulton i përfshirë në disa ngjarje kriminale në vend dhe ku ka qenë edhe shënjestër e disa atentateve. Në vitin 2019, në një atentat ndaj Hakës në shtëpinë e tij mbeti e vrarë halla e tij. Ndaj tyre u qëllua me 100 plumba, ndërsa Haka arriti të shpëtonte, pasi mori vetëm një plumb në krah. Ndërkohë një tjetër atentat ndaj tij u bë në vitin 2022, ku sërish mbijetoi pasi u plagos me një plumb në nofull. Më 12 qershor të këtij viti në Dubai u arrestua Durim Bami, i cili gjithashtu është në akuzë në dosjen “Revanshi” për katër vepra penale, nga sigurimi i kushteve për vrasje deri tek grup i strukturuar kriminal, kultivim droge dhe kryerje të veprave penale nga organizata kriminale.