Prokuroria e Posaçme njoftoi mbylljen e hetimeve edhe për pesë nga nëntë anëtarët e bandës së Laert Haxhiut, që akuzohet si kreu i një grupi të strukturuar kriminal me aktivitet vrasjet, gjobëvënien, vjedhjen dhe shkatërrimin e pronës. Të pandehurit akuzohen për kryerjen e 14 krimeve gjatë periudhës prill 2021 – maj 2023, konkretisht për pesë vrasje, nga të cilat njëra ka mbetur në tentativë; katër raste të shkatërrimit të pronës me eksploziv; vjedhje me armë në dy raste; në një rast për sigurim të kushteve dhe mjeteve materiale për të kryer vrasje; si dhe dy herë mbajte pa leje të armëve e municioneve. Grupi akuzohet ndër të tjera se në periudhën 2021-2022 ka organizuar dhe ekzekutuar vrasjet e Çajup Selimit në Tepelenë, Albi Bashaliut në Peqin dhe Rexhep Ginës e Genci Hidës në Lushnje, ndërsa në qershor 2022 janë edhe autorë të vendosjes së një sasie tritoli në biznesin e këngëtarit Rigels Rajku, njohur me emrin Noizy. Sipas SPAK, në krye të këtij grupi qëndron i hetuari Laert Haxhiu, i cili e drejtoi dhe organizoi veprimtarinë kriminale. Si pjesëtarë të bandës, prokuroria cilëson nëntë të pandehur, ku për katër prej tyre dosja u mbyll në nëntor të vitit të kaluar.