Komisioni Qendror i Zgjedhjeve i ka bërë thirrje partive politike të ndalin gjuhën e ashpër dhe sjelljen konfliktuale gjatë fushatës elektorale. Duket qe KQZ te këtë marrë shkas nga dy ngjarjet e fundit, të dyja të ndodhura në qytetin e Elbasanit. Pak ditë më parë militantë të dy partive kryesore në vend, u përplasën fizikisht në Ditën e Verës, kur në qytet ishin të pranishëm kryeministri kryetari I opozitës, ndërsa e fundit, një ditë më parë konflikti fizik mes kandidatit të PD, Luçiano Boçi, dhe biznesmenit Gjergj Luca. Zgjedhjet janë për qytetarët, partitë politike të tregojnë maturi dhe vetëpërmbajtje, tërheq vemendjen Kqz, me anë të një deklarate për shtyp. Duke marrë në konsideratë retorikën politike të ditëve të fundit, Komisioni Qendror i Zgjedhjeve, për administrimin e zgjedhjeve, në përputhje me standardet më të mira, i bën apel të gjithë aktorëve politik për vetëpërmbajtje dhe maturi në sjelljen dhe mesazhet politike dhe elektorale të tyre, thuhet ne deklaratë. Duke nënvizuar se gjuha e ashpër dhe sjellja konfliktuale nuk i shërben interesit të qytetarëve për zhvillimin e zgjedhjeve të lira, të ndershme dhe demokratike, si dhe eshtë kusht për integrimin europian të vendit. Gjithashtu, në respekt të standardeve të zgjedhjeve të ndershme, KQZ i bën apel edhe zyrtarëve të angazhuar si garues në zgjedhjet e datës 25 prill, që të ndajnë angazhimin e tyre si kandidat për deputet me atë të drejtuesit të entit shtetëror përkatës.