Para se komisioneri Ilirjan Celibashi të shpërndajë mandatet në qarkun e Tiranës, kryetari i partisë ‘Shqipëria Bëhet’, Adriatik Lapaj i ka kujtuar përmes një shkrese zyrtare dorëheqjet e kandidatëve të listës së mbyllur. Duke cituar kodin e procedurës administrative, në letër ai kërkon një konfirmim me shkrim se dorëheqjet e paraqitura janë konsideruar të miratuara në heshje. Kjo do i bënte ato të parevokueshme dhe automatikisht do e kalonte mandatin tek emri më i votuar i listës së hapur, që është Adriatik Lapaj, duke mos marrë parasysh prapësimet e dy kandidatëve Zeqir Kordhoni dhe Kleana Xhuveli. Pra kryetari i ‘Shqipërisë Bëhet’ arsyeton se referuar nenit 97 të kodit të procedurës administrative, për aq kohë sa KQZ nuk është shprehur me vendim, dorëheqjet konsiderohen të miratuara në heshje, dhe për këtë kërkon konfirmim.