Ndërsa bota nxiton të gjejë një vaksinë për të ndalur Covid 19, zyrtarët e shëndetësisë në Britaninë e Madhe janë të shqetësuar për keqinformimet mbi vaksinat që po përhapen gjithnjë e më shumë. Një sondazh i fundit i YouGov, gjeti se thuajse një në gjashtë britanikë do të refuzonte një vaksinë koronavirusi nëse ajo do të bëhej e disponueshme, me gjashtë të tjerë që thonin se nuk ishin të sigurt nëse do ta bënin apo jo. Një tjetër studim zbuloi kohët e fundit se njerëzit që e marrin informacionin nga mediat sociale, kanë gjasa të hezitojnë më shumë për marrjen e një vaksine. Sipas ekspertëve, pjesa më e madhe e njerëzve që hezitojnë përballë vaksinës synojnë ta marrin informacionin nga media sociale dhe jo nga organet normale të shtypit. Kjo sepse keqinformimet lulëzojnë në platformat e medias sociale.