Kancelari gjerman Olaf Scholz këtë javë ka udhëtuar drejt Ukrainës dhe Rusisë në përpjekje për të ndihmuar në zbutjen e situatës dhe tensioneve të shkaktuara kohët e fundit mes dy vendeve. Gjermania ka qenë një nga shtetet që u ka bërë thirrje qytetarëve të saj që ndodhen në Ukrainë, të largohen që aty deri kur tensionet mes dy vendeve të ulen dhe situata të stabilizohet. Përpara vizitave të tij të para si kancelar në Kiev, të hënën dhe Moskë, dhe të martën për takime me presidentët ukrainas dhe rus, zoti Scholz përsëriti paralajmërimin e tij ndaj Rusisë, ndërsa edhe njëherë bëri thirrje që të vazhdojnë përpjekjet diplomatike. Kancelari gjerman u shpreh se çdo agresion ushtarak do të kishte pasoja të rënda për Rusinë dhe perspektivën e saj, dhe se ne jemi të bashkuar me aleatët tanë. Por ai shtoi se duhen bërë të gjitha përpjekjet për vazhdimin e bisedimeve. Megjithatë një burim nga qeveria gjermane i tha agjencisë së lajmeve Reuters se Berlini nuk pret rezultate konkrete nga bisedimet me Presidentin rus, Vladimir Putin. Ndërkohë zëvendës kancelari dhe ministri i ekonomisë i Gjermanisë, Robert Habeck, tha të dielën në një intervistë se Evropa mund të jetë në prag të luftës.