Aeroporti i Hamburgut vazhdon të qëndrojë i mbyllur edhe të dielën pasi policia po heton një situatë të mundshme të marrjes peng të një fëmijë. Aeroporti është mbyllur për të gjitha uljet dhe nisjet që mbrëmjen e së shtunës, pasi policia shtoi përforcimet atje, për të kryer hetime mbi një burrë që duket se kishte hyrë me makinë përtej traut të aeroportit, me një fëmijë. Një zëdhënës i policisë tha se makina me burrin 35-vjeçar dhe një vajzë katërvjeçare është parkuar nën një aeroplan. “Operacioni vazhdon. Negociatorët tanë janë në kontakt me personin që ndodhet në makinë”, tha policia të dielën. Sipas policisë, oficerët janë duke komunikuar më burrin në gjuhën turke, me ndihmën e një përkthyesi. Policia ka thënë se nëna e fëmijës u ka thënë zyrtarëve se babai i vajzës ka qenë në kontakt me të. Policia nuk ka konfirmuar deklaratat e mëhershme se burri ka qenë i armatosur dhe ka qëlluar me armë zjarri. Autoritetet në Hamburg thanë ndërkohë se 286 fluturime me rreth 34.500 pasagjerë janë shtyrë.