Ministri për diasporën Pandeli Majko, një nga figurat më të vjetra, sipas detyrimeve ligjore ka bërë deklarimin e pasurisë në vite pranë Inspektoriatit të Lartë i Deklarimit dhe Kontrollit të Pasurive dhe Konfliktit të Interesit. Rrjeti investigativ Birn ka marrë në analizë të gjitha deklaratat e pasurisë të Majkos nga 2003-2020, ku në deklaratën e parë të dorëzuar në ILDKPKI në vitin 2003, ai deklaronte pasuri familjare me vlerë 5.7 milionë lekë, ndërsa në fund të vitit 2018 pasuria ka shënuar rritje me 3 herë, duke kapur vlerën e 19.8 milionë lekëve. Sipas këtyrë të dhënave Majko zotëron familjarisht pasuri të patundshme me vlerë 15.9 milionë lekë, likujditete bankare prej 2.3 milionë lekësh, kursime në cash prej 950 mijë lekësh dhe një automjet me vlerë 500 mijë lekë. Të ardhurat familjare për periudhën deklaruese janë 46.4 milionë lekë, nga të cilat 56% kanë si burim pagën e Majko dhe gati 4% pagën e bashkëshortes. Të ardhurat nga dhënia me qira e një apartamenti përbëjnë 36% të totalit, ndërsa 3% të tjera janë siguruar nga shitja e pasurisë së patundshme. Raporti birn ka bërë edhe kontrollin aritmetik/logjik të deklarimeve të subjektit, ku për 15 vite të deklarimit, nga të cilat dy prej deklaratave rezultuan me probleme. Në vitin 2005, Majko deklaron blerjen e një automjeti me vlerë 6 mijë USD si dhe pagesën vjetore të kësteve të një kredie prej rreth 829 mijë lekësh, pa pasur asnjë të ardhur personale apo familjare për vitin, duke rezultuar me burime të pamjaftueshme financiare prej 1.4 milionë lekësh. Majko rezulton me burime të pamjaftueshme për të justifikuar shtesën e pasurisë edhe në vitin 2008, kur deklaron një kontratë sipërmarrjeje për blerjen e një apartamenti me çmim 129 mijë euro. Në vitet në vazhdim, deklaruesi jep të dhëna kontradiktore për këstet e paguara dhe detyrimet për apartamentin, të cilat nuk përputhen as në vlerë dhe as në kronologji. Në vitin 2010, Z. Majko deklaron se kontrata e apartamentit përbëhet nga kësti i parë prej 39,400 euro, kësti i dytë prej 40,000 euro dhe kësti i tretë prej 8000 euro. Në vitin 2011, ai deklaron se ka mbetur si detyrim kësti i tretë prej 16,630 euro, ndërsa në vitin 2012 deklaron se nuk është paguar kësti i tretë prej 42,000 euro. Përfundimisht në vitin 2018, ai deklaron se kësti i papaguar është 21,600 euro. Bazuar në këto deklarime, Z. Majko rezulton me diferencë negative në vitin 2008 për shtesën e asetit në vlerën e 8.4 milionë lekëve.