Ministrat e Financave dhe dhe Guvernatorët e bankave qëndrore të vendeve të Evropës diskutuam në një takim online me Drejtoren e Përgjithshme të Fondit Monetar Ndërkombëtar, zj. Kristalina Georgieva mbi zhvillimet dhe masat e marra për të zbutur ndikimin e pandemisë në ekonomi. Në takim u diskutua edhe për strategjitë që po ndiqen për të siguruar rimëkëmbjen dhe për të forcuar qëndrueshmërinë, duke trajtuar gjithashtu sfidat afatgjata në ekonomi. Shefja e FMN Georgieva, tha se për shkak të pandemisë ekonomitë e zhvilluara dhe ato në zhvillim u goditën ashpër gjatë vitit 2020. Ajo shtoi se natyra e goditjes pandemike kërkon mbështetje të vazhdueshme të politikave, në varësi edhe të hapësirave që këto politika kanë në vendet e rajonit. Ndërsa Alfred Kammer, Drejtori për Evropën në FMN, vlerësoi marrjen në kohë të masave të jashtëzakonshme nga secili vend dhe theksoi rëndësinë e bashkëpunimit ndërkombëtar për zgjidhje efektive rajonale dhe globale. Gjatë takimit guvennatori shqiptar Gent Sejko prezantoi përvojën dhe sfidat me të cilat u përballën institucionet dhe politikëbërësit në vendin tonë gjatë menaxhimit të kësaj situate. Sipas Sejkos tërmeti i vitit 2019 dhe pandemia shkaktuan goditje të dyfishtë brenda një periudhe kohore të shkurtër. Si përgjigje, nga Banka e Shqipërisë vendosi uljen e normës bazë të interesit dhe shtimin e injektimeve të likuiditetit; lehtësimi rregullator i përkohshëm në nxitje të shtyrjes së pagesës së kësteve dhe të ristrukturimit të kredive; pezullimi i pagesave të dividentit në sektorin bankar; si dhe, heqja e tarifave të transaksioneve ndërbankare në sistemet tona të pagesave. Guvernatori shtoi se të gjithë aktorët publikë në vend kanë marrë masa ekonomike të koordinuara dhe në kohën e duhur, në aspektin fiskal, monetar duke zbutur efektet negative të pandemisë. Ai evidentoi rolin e Instrumentit të Financimit të Shpejtë akorduar Shqipërisë nga FMN në fillimet e pandemisë, i cili mbështeti stimulin tonë fiskal, lehtësoi ndikimin e tij në tregjet e brendshme financiare dhe sinjalizoi aftësinë e vendit për të aksesuar burime të ndryshme financimi.