Pas një ngërçi institucional dhe mosfunksionimit prej gati dy vitesh, 7 anëtarët e Gjykatës Kushtetuese kanë zhvilluar mbledhjen e parë. Gjyqtarët kushtetues kanë në rend dite caktimin e seancave gjyqësore si dhe procedurat për caktimin e kryetarit. Siç është bërë e ditur janë 25 çështje të bëra gati, që do të shqyrtohen nga 7 anëtarët e Gjykatës Kushtetuese. Më e rëndësishmja e të cilave është padia e shoqatës së bashkive, që kërkojnë shpalljen si antikushtetuese të zgjedhjeve të 30 qershorit 2019, të cilat në atë kohë u kthyen në një front grindjesh politike. Gjyqtarët kushtetues do të testohen edhe me ankesa si ajo e kryeministrit kundër presidentit Ilir Meta, i cili pasi refuzoi të dekretonte Gent Cakajn si ministër të Jashtëm, u padit në Gjykatën Kushtetuese nga kreu i qeverisë, që kërkon zgjidhjen e mosmarrëveshjes së kompetencave dhe interpretim të nenit 1 të Kushtetutës. Dosje të nxehta e presin Kushtetuesen edhe për dy padi të presidentit Meta me emrin Teatri Kombëtar. Në njërën prej tyre kërkohet shpallja e papajtueshme e projektit urban të godinës së re të Teatrit Kombëtar dhe në tjetrën kundërshtohet një vendim i 8 majit 2020, në të cilën Teatri Kombëtar i kaloi bashkisë dhe tjetra gjithashtu, edhe çështja e pronave, sipas padisë së shoqatës kombëtare “Pronësi dhe Drejtësi”. Që nga viti 1992 kur dhe u krijua, në Gjykatën Kushtetuese janë trajtuar parime të rëndësishme duke nisur nga shpallja si antikushtetues të ligjit për dënimin me vdekje, ligji i lustracionit, deti , vettingu e kthimi dhe kompensimi i pronave. Gjykata kushtetuese u bë funksionale javën e fundit të vitit 2020, me emerimet e tre anëtarëve të rinj Altin Binajt i votuar nga Kuvendi, Përparim Kalo dhe Sonila Bejtja të dekretuar nga kreu i shtetit si emerime të ardhura nga KED. Venia në funksion e Gjykatës Kushtetuese brenda vitit 2020 ishte kërkuar nga faktori ndërkombëtar me ngulm sidomos nga shba, dhe konsiderohet si një nga kushtet për hapjen e negociatave zyrtare të anëtarësimit të vendit në BE.