Seanca e parë në themel për dosjen “Partizani” dështoi të zhvillohej për shkak se ish kryeministri Sali Berisha nuk kishte marrë njoftim nga policia e shtetit për t’u paraqitur në GJKKO në orën 10.00 këtë të hënë. Sipas mbrojtjes ligjore të Berishës, njoftimi në banesën e tij ka shkuar të premten, por është firmosur nga Malltezi, për këtë arsye trupa gjykuese shtyu seancën në datë 21 korrik ora 10.30. Në shkallën e parë të gjyqësorit pritej që fillimisht të shqyrtohej edhe kërkesa e Malltezit për revokim të masës së sigurisë, por relatorja e çështjes Elsa Ulliri njoftoi se ka paraqitur kërkesë për dorëheqje nga dosja “Partizani”. Një nga argumentat që paraqiti Ulliri ishte fakti se ajo ndodhet në konflikt interesi, për shkak se është kushërirë me deputeten demokrate Andia Ulliri. Kjo kërkesë u bë shkak për shtyrjen e seancës në 7 korrik.