Parlamenti i ka dhënë dritën jeshile blerjes së vaksinës ruse anti Covid, Sputnik. Me me 95 vota pro, 4 kundër dhe 5 asbtenime deputetët miratuan aktin normativ “Për dhënien e autorizimit ministrit të Shëndetësisë dhe Mbrojtjes Sociale dhe ministrit të Shtetit për Rindërtimin për zhvillimin e negociatave me prodhuesit, apo me distributorë të autorizuar, me qeveritë ose institucionet e autorizuara prej tyre, të vendeve që prodhojnë ose distribuojnë vaksina anticovid, për të siguruar këto vaksina, të cilat janë të certifikuara nga trupa certifikuese në vendin e prodhimit të tyre”. Kjo i hap rrugë marrjes se vaksinave ruse që dikur ishin kontestuar nga ana e qeverisë shqiptare. Dritë jeshile i jepet me këtë akt edhe vaksinës kineze. Gjithashtu Kuvendi votoi dhe dy aktet e tjera që lidhen me vaksinat anti Covid me 96 vota pro. Ato janë “Për miratimin e tekstit të marrëveshjes për prodhimin dhe furnizimin nga dhe ndërmjet PFIZER dhe ministrisë së Shëndetësisë, Institutit të Shëndetit Publik dhe ministrit të Shtetit për Rindërtimin, autorizimin e procedurës për lejimin e hyrjes dhe administrimit të vaksinave antiCOVID-19 në Republikën e Shqipërisë si dhe përdorimin e tyre në popullatë” miratuar më herët gjatë ratifikimit të marrëveshjes mes Këshillit të Ministrave përfaqësuar nga ministria e Shëndetësisë dhe Aleancës COVAX për pjesëmarrjen në strukturën globale të qasjes në vaksinat COVID-19.