Në kuadër të Marrëveshjes se Bashkëpunimit midis Prokurorisë së Përgjithshme dhe Prokurorisë së Posaçme kundër Korrupsionit dhe Krimit të Organizuar, në Prokurorinë Fier u zhvillua të premten takimi mes Drejtuesit të Prokurorisë së Posaçme, Altin Dumani dhe prokurorëve të kësaj prokurorie. Në fokus të këtij takimi, sipas njoftimit zyrtar, ishte bashkëpunimi dhe koordinimi mes Prokurorisë së Posaçme dhe Prokurorisë se Juridiksionit të Përgjitshëm Fier, në hetimin e të gjitha ngjarjeve që prekin zgjedhjet e lira e demokratike gjate periudhës zgjedhore, kryesisht në vlerësimin me kujdes të shtuar të informacioneve, kryerjen me cilësi dhe në një kohë sa më të shkurtër të veprimeve të para hetimore, vënien menjëherë në dijeni të Prokurorisë së Posaçme për veprat penale në kompetencë lëndore të saj. Prokuroria e Posaçme në janar të këtij vitit ngriti një task forcë për hetimin e krimeve zgjedhore. Në krye të këtij grupi të posaçëm do të jetë vetë kreu i SPAK Altin Dumani, i cili do të hetojë veprimtaritë e dyshimta deri më 11 maj. Pas Tiranës, Fieri është qarku me numrin më të madh të mandateve për deputetë që prodhon në Kuvendin e Shqipëri, me 16 të tillë.