Një tërmet i fortë me magnitudë 5.8 ballë goditi Greqinë dhe Turqinë duke vrarë një person dhe duke i çuar vendasit e frikësuar të hidheshin nga ndërtesat. Tërmeti goditi pak pas orës 2 të mëngjesit sipas orës lokale këtë mëngjes në rreth 67 km thellësi dhe pak larg bregdetit të Turqisë jugperëndimore. Rreth 70 persona u lënduan ndërsa përpiqeshin të dilnin nga ndërtesat që tundeshin, përfshirë disa që "u hodhën nga lartësitë për shkak të panikut" në qytetin e afërt të Muglas, sipas ministrit të brendshëm të Turqisë. Shtatë persona u plagosën pasi u hodhën nga dritaret ose ballkonet në panik, tha guvernatori i Muglas. Tërmeti u ndje përgjatë Bregut të Turqisë dhe në rajonet fqinje, përfshirë ishullin grek të Rodosit, duke zgjuar shumë njerëz nga gjumi. Nga të plagosurit, 14 u trajtuan në vendngjarje, tetë morën ndihmën e parë dhe u larguan nga spitali ndërsa 46 të tjerë po trajtohen në spital, tha ministri i brendshëm i Turqisë. Nuk ka raportime për të lënduar në Greqi dhe tërmeti u ndje deri në Egjipt. Tërmeti vjen vetëm disa javë pasi një tërmet i fuqishëm me magnitudë 6.2 goditi Stambollin, duke plagosur të paktën 150 persona. Turqia përshkohet nga dy vija të mëdha thyerjeje dhe tërmetet janë të shpeshta. Një tërmet me magnitudë 7.8 më 6 shkurt 2023 dhe një dridhje e dytë e fuqishme që erdhi disa orë më vonë, shkatërruan ose dëmtuan qindra mijëra ndërtesa në 11 provinca jugore dhe juglindore turke, duke lënë më shumë se 53,000 njerëz të vdekur. 6,000 të tjerë u vranë në pjesët veriore të Sirisë fqinje.