Prej gati 4 muajsh në ngërç politik në parlamentin e Kosovës, presidentja Vjosa Osmani ka ftuar subjektet politike për një takim të mërkurën, për t’u konsultuar rreth datës së zgjedhjeve lokale. Pas konsultimeve, presidentja do të caktojë datën e zgjedhjeve. Zgjedhjet e fundit lokale në Kosovë janë mbajtur në tetor të vitit 2021. Lidhja Demokratike e Kosovës pati dalë e para, e pasuar nga Lëvizja Vetëvendosje dhe Partia Demokratike e Kosovës. Diskutimet për përcaktimin e datës së zgjedhjeve lokale po bëhen në kohën kur Kosova ende nuk ka Qeveri të re, si pasojë e moskonstituimit të Kuvendit të Kosovës. Kuvendi ka dështuar prej 25 herë që të konstituohet. Përfaqësuesit diplomatikë të shteteve të QUINT-it si dhe Shefi i Zyrës së Bashkimit Evropian në Kosovë, janë takuar ditë më parë me kryeministrin Albin Kurtin, duke kërkuar formim të shpejtë të institucioneve.