Kombet e Bashkuara thonë se viti i kaluar ka qenë ndër një dy vitet më të nxehta të regjistruara ndonëjherë dhe paralajmëroi se bota po përballet me një rritje "katastrofike" të temperaturave këtë vit. Të dhënat u publikuan në një raport të Organizatës Botërore të Meteorologjisë. Organizata me bazë në Gjenevë nënvizoi se dekada që sapo ka përfunduar,2010-2020, ka qenë më e nxehta e regjistruar, ndërsa vitet 2016 dhe 2020 janë shënuar si vitet më të nxehta që kur njerëzit kanë filluar të masin temperaturat. Vitin e kaluar, temperatura mesatare globale ishte rreth 14.9 gradë Celsius, thuhet në raport. Kjo është rreth 1.2 gradë Celsius mbi nivelet e regjistruara para epokës industriale, duke filluar rreth vitit 1850. "Këtë shekull ne jemi drejt një rritje katastrofike të temperaturës prej 3-5 gradë Celsius", u shpreh sekretari i Përgjithshëm i Kombeve të Bashkuara, Antonio Guterres, përmes një deklarate. Raporti, është një përmbledhje e pesë grupeve të të dhënave ndërkombëtare të ndryshme duke përfshirë edhe agjencinë hapësinore në SHBA, NASA. Viti i kaluar ishte "një shembull i asaj se si është të jetosh nën disa nga efektet më të rënda të ndryshimit të klimës", tha meteorologia e NASA-s, Lesley Ott. Pamjet: AFP