Këtë të shtunë ka nisur në Parkun Olimpik në kryeqytet numërimi I votave me postë nga Greqia, të cilat janë kontestuar që prej të dielës nga Partia DEmokratike, e cila ngre akuza për manipulim të tyre. Komisioneri Shtetëror Ilirjan Celibashi vendosi një ditë më parë hapjen e zarfeve, dhe mëngjesin e kësaj të shtune ka nisur edhe procesi i numërimit. Të parat vota të hapura janë ato që I përkasin Qarkut të Tiranës, për të vijuar më tej me qarqet e tjera, teksa të pranishëm janë edhe vëzhgues të opozitës. Sipas Celibashit, nuk ka pasur asnjë kuti me probleme apo të kontestuar me prova dhe në këtë mënyrë i hapej ligjërisht rrugë numërimit të tyre. Por pas këtij vendimi, demokratët vijuan sërish me tentativat bllokuese, duke dërguar mbrëmjen e së premtes një tjetër ankesë në KAS. Ditën e djeshme, edhe Kolegji Zgjedhor rrëzoi kërkesën e PD, duke lënë në fuqi vendimin e mëparshëm të KAS për votën e Greqisë pas ankimimit të PS-së. Më herët, KAS ishte shprehur lidhur me ankimimin e PS-së për të ‘bllokuar’ përkohësisht votën e Greqisë, duke e cilësuar vendimin e Celibashit si të paligjshëm. Sipas PD, vota në Greqi është manipuluar dhe është shkelur marrëveshja për dorëzimin personalisht nga operatori postar të votave në këtë shtet.