Autoritetet e Kosovës kanë filluar zbatimin e një plani, mbi të cilin është formuar një grup pune, që do të merret ekskluzivisht me ngacmimin seksual të grave në veri, pas shtimit të rasteve. Plani është konfirmuar nga zëvendësdrejtori i Policisë së Kosovës për rajonin e veriut, Veton Elshani për Radio Evropa e Lirë. Sipas tij, një pjesë e planit operativ është që në pesë rrugët kryesore në Mitrovicën e Veriut të vendosen nga dy policë me kamera në uniformë, që do të monitorojnë çdo ngacmim të mundshëm ndaj grave. “Njëri ose të dy policët flasin gjuhën serbe, pika statike është në Lagjen e Boshnjakëve, ndërsa gjatë natës angazhohen edhe hetues civilë. Do të ndalohen të gjithë personat e dyshimtë, ose ata që ngasin vetura me xhama të errët”, ka treguar Elshani. Plani operativ do të zgjasë tre muaj, ndërsa pas kësaj periudhe do të shqyrtohet nëse ka nevojë për zgjatje. Ministrja e Drejtësisë në detyrë, Albulena Haxhiu më herët ka reaguar në lidhje me fenomenin, duke u shprehur se çdo rast I pavarësisht etnisë apo vendndodhjes së viktimës do të trajtohet me profesionalizëm.