Djali i bosit të burgosur të kartelit Sinaloa, Joaquin "El Chapo" Guzman nuk e rrëmbeu lordin e drogës Ismael "El Mayo" Zambada, tha avokati i familjes Guzman të mërkurën, pas raportimeve se djali i Guzman kishte tradhtuar Zambadën për ta cuar atë pa dijeni në Shtetet e Bashkuara. Joaquin Guzman Lopez dhe Zambada, një nga trafikantët më të rëndësishëm në historinë meksikane, u arrestuan javën e kaluar nga agjentët amerikanë pasi avioni me të cilin ata po udhëtonin u ul në një pistë të vogël ajrore në Neë Mexico. Pas arrestimeve, të kryera pa dijeninë e qeverisë meksikane, u shtuan spekulimet nëse të dy ata ishin dorëzuar apo Guzman Lopez e kishte futur Zambadën në një kurth. “As nuk bëhet fjalë për një rrëmbim”, tha avokati i familjes Guzman, Jose Luis Gonzalez. "Los Chapitos u përmbahen rregullave të babait të tyre dhe ata ndoqën politikën e zakonshme," tha ai, kur u pyet nëse Guzman Lopez mund të ketë tradhtuar 76-vjeçarin Zambada, i cili bashkëthemeloi kartelin legjendar Sinaloa së bashku me të atin. Katër djemtë e El Chapos, të njohur si "Los Chapitos", trashëguan pjesën e kartelit të babait të tyre. Gonzales kundërshton kështu avokatin e Zambadës, Frank Perez, i cili tha të shtunën se Guzman Lopez "rrëmbeu" klientin e tij. Perez tha se Guzman Lopez dhe gjashtë burra me uniforma ushtarake i zunë pritë Zambadës pranë kryeqytetit të shtetit Sinaloa, Culiacan, dhe e detyruan të hipte në një aeroplan për në Shtetet e Bashkuara kundër dëshirës së tij. Si Guzman Lopez ashtu edhe Zambada janë deklaruar të pafajshëm për akuzat për trafik droge në gjykatat amerikane. Avokati i familjes Guzman tha se dorëzimi i tyre ishte vullnetar dhe pasoi rreth katër vjet negociata me autoritetet amerikane.