Moska nuk shqetësohet për rrezikun e sanksioneve perëndimore nëse do të pushtonte Ukrainën, tha ambasadori i Rusisë në Suedi për një gazetë suedeze. “Më falni për gjuhën time, por ne nuk na interesojnë sanksionet e tyre”, tha Viktor Tatarintsev, për gazetën Aftonbladet. "Ne kemi pasur tashmë kaq shumë sanksione dhe në këtë kuptim ato kanë pasur një efekt pozitiv në ekonominë dhe bujqësinë tonë," tha diplomati veteran, i cili flet rrjedhshëm suedisht dhe është dërguar katër herë për të shërbyer në vendin skandinav. "Ne jemi tani më shumë të mbështetur tek kapacitetet tona dhe ia kemi dalë të rrisim eksportet. Nuk kemi djath italian apo zviceran, por kemi mësuar të bëjmë djathra rusë po aq të mirë duke përdorur receta italiane dhe zvicerane", tha ai. Ai shtoi se “sanksionet e reja nuk janë asgjë pozitive, por jo aq të këqija sa thotë Perëndimi”. Tatarintsev akuzoi Perëndimin se nuk e kuptonte mentalitetin rus. "Sa më shumë Perëndimi ta shtyjë Rusinë, aq më e fortë do të jetë përgjigja ruse," tha ai. Komentet e diplomatit vijnë pasi shtetet perëndimore kanë frikë se Moska po përgatit një pushtim të Ukrainës, pasi pothuajse ka rrethuar fqinjin e saj perëndimor me më shumë se 100,000 trupa. Uashingtoni ka paralajmëruar se një pushtim i gjithanshëm mund të fillojë "çdo ditë". Tatarintsev këmbënguli se Moska po përpiqet të shmangë një luftë. "Kjo është dëshira më e sinqertë e lidershipit tonë politik. Gjëja e fundit që njerëzit në Rusi duan është lufta", tha ai.