Në periudhën e paralajmërimeve amerikane për pushtim të shpejtë rus, presidenti ukrainas, Volodymyr Zelenskyi ka shpallur 16 shkurtin si ditë të unitetit. Inteligjenca amerikane ka dhënë shenja se 16 shkurti mund të jetë datë e mundshme e pushtimit rus. “Neve na është thënë se 16 shkurti do të jetë ditë e pushtimit, por ne do ta bëjmë atë ditë të unitetit”, ka thënë Zelenskyi përmes një video mesazhi më 14 shkurt. Ukrainasit pritet të mbajnë lart flamujt e shtetit dhe të këndojnë himnin shtetëror. “T’i tregojmë botës për unitetin tonë”, ka thënë Zelenskyi. Disa orë pasi ka bërë deklaratën për 16 shkurtin, Zelenskyi ka sqaruar deklaratën e tij, duke thënë se vetëm u është referuar raportimeve në media për sulm të mundshëm. Zëdhënësi i tij, Sergii Nykyforov, ka thënë se presidenti ukrainas, i cili më parë ka qenë komedian, vetëm ka thënë atë që është raportuar gjithandej. “Presidenti i është referuar datës që është përhapur në media”, ka thënë ky zëdhënës për NBC Neës. I pyetur për referencën e Zelenskyit për 16 shkurtin, zëdhënësi i Pentagonit, John Kirby ka thënë se nuk do të diskutojë detaje specifike të inteligjencës mirëpo sipas tij “është plotësisht e mundshme që ai të bëjë lëvizje me pak apo aspak paralajmërim”. Megjithatë, Kirby ka thënë se Shtetet e Bashkuara ende nuk besojnë se Moska ka marrë vendim përfundimtar nëse do të pushtojë Ukrainën.