Kryeministri izraelit Benjamin Netanyahu ka kritikuar ashpër Kombet e Bashkuara, duke i akuzuar për përhapje të “gënjeshtrave” dhe “justifikimeve të rreme” në lidhje me përpjekjet humanitare në Rripin e Gazës. Gjatë një vizite në Bazën Ajrore Ramon në Izraelin jugor, ai theksoi se Izraeli ka lejuar futjen e ndihmave humanitare, pavarësisht pretendimeve të kundërta. “Ne kemi lejuar ndihma humanitare të hyjnë deri më tani dhe do të vazhdojmë ta bëjmë këtë në një nivel minimal”, deklaroi Netanyahu. Ai kritikoi OKB-në për atë që e quajti "gënjeshtër", duke thënë se pretendimet se Izraeli nuk po lejon ndihmat të hyjnë janë të pabaza. Më parë Netanyahu iu referua gjithashtu një “pauze taktike” të shpallur nga ushtria izraelite dhe përcaktimit të rrugëve të sigurta për kalimin e ndihmës gjatë fundjavës, duke thënë se “këto rrugë kanë qenë gjithmonë aty, por tani janë zyrtare. Nuk ka më justifikime”. Megjithatë, sipas Zyrës së OKB-së për Koordinimin e Çështjeve Humanitare ndihmat vazhdojnë të përballen me pengesa të shumta për shkak të refuzimeve ose vonesave të rregullta nga Forcat Mbrojtëse të Izraelit, gjë që e bën të vështirë planifikimin dhe zbatimin e operacioneve humanitare në terren.