SHBA paralajmëroi se do të ketë një përgjigje "të shpejtë dhe të ashpër" nga Shtetet e Bashkuara dhe vendet aleate, nëse Rusia dërgon forca ushtarake në Ukrainë. Sekretari amerikan i shtetit, Antoni Blinken, tentoi sidoqoftë nga berlini të shuante polemikat për pozicionin e SHBA dhe vendeve aleate të NATO-s, pasi presidenti Joe Biden u kritikua ashpër për komentin se “një ndërhyrje e vogël" nga Rusia do të merrte një përgjigje më të ulët. "Nëse forcat ushtarake ruse kalojnë kufirin ukrainas dhe kryejnë akte të reja agresioni ndaj Ukrainës, ato do të marrin një përgjigje të shpejtë, të ashpër dhe të bashkuar nga Shtetet e Bashkuara, aleatët dhe partnerët tanë", tha Blinken.Ai akuzoi më pas rusinë se po rrezikon themelet e rendit botëror me grumbullimin e rreth 100 mijë forcave ushtarake pranë kufirit me Ukrainën. Ai tha se Rusia duhet të përballet me një përgjigje të koordinuar dhe të ashpër globale në rast se pushton Ukrainën. Paralajmërimi i ashpër u bë nga Berlini, qyteti dikur i ndarë që ishte bërë simbol i Luftës së Ftohtë mes Lindjes dhe Perëndimit.