Operacioni ndërkombëtar i antidrogës i koduar “tibus’ ka vijuar dhe gjatë mëngjesit të së mërkurës, ku është vënë në pranga nga policia e Vlorës edhe personi i gjashtë i përfshirë në këtë rrjet të trafikut të narkotikëve. Në vazhdim të veprimeve të ndërmarra që një ditë më parë, pas kryerjes së kontrolleve është vënë në pranga në vlorë 30 vjeçari Andi Veshaj. Arrestimi i tij u bë pasi edhe ky shtetas, ashtu si 5 shtetasit e tjerë të arrestuar mëngjesin e një dite më parë ishte shpallur në kërkim ndërkombëtar nga Interpol Roma, Itali, pasi Gjykata e Romës, Itali, ka lëshuar urdhër-arrestin për kryerjen e veprës penale “Organizatë kriminale me qëllim trafikun e narkotikëve”. Gjatë së martës u arrestuan në Vlorë me qëllim ekstradimin drejt Italisë, Eriseld Nelaj, Albano Jazaj, Dionis Maskaj, Zigur Aliaj, Rezart Elmazaj.” Sipas policisë këta shtetas, në bashkëpunim me pjesëtarët e tjerë të organizatës kriminale, dyshohen se në harkun kohor qershor 2018 deri në janar të 2019, kanë qenë të angazhuar në këtë grupim kriminal, me qëllim trafikimin e lëndëve narkotike nga Shqipëria në drejtim të Italisë dhe vendeve të tjera të Evropës.