Ndërsa na ndajnë pak javë nga nisja e sesionit të ri parlamentar, në muajin shtator, ambasada e Shteteve të Bashkuara të Amerikës në Tiranë ka zhvilluar një takim me disa prej deputetëve të rinj të zgjedhur në parlamentaret e 11 majit. Përfaqësuesit e ambasadës amerikane kanë takuar një grup nga ligjvënësit e rinj, që do të futen për herë të parë në Parlament, në legjislaturën e re. Përmes një njoftimi të shpërndarë nga ambasada e SHBA në Tiranë, takimi me deputetët e rinj kishte për qëllim të kuptonin më mirë shqetësimet dhe prioritetet e komuniteteve që ata përfaqësojnë. “Personeli i Ambasadës së Shteteve të Bashkuara u takua me anëtarë të sapozgjedhur të Kuvendit për të kuptuar shqetësimet e komuniteteve të tyre dhe përparësitë në prag të fillimit të mandatit. Ne presim me kënaqësi të punojmë me përfaqësues të zgjedhur nga i gjithë spektri politik për të vijuar partneritetin tonë të ngushtë me Shqipërinë”, thuhet në njoftimin e ambasadës. Në takimin me përfaqësuesit e ambasadës amerikane në Tiranë ishin deputetët e rinj nga radhët e Partisë Socialiste, Ilva Gjuzi, e zgjedhur në Tiranë, Ana Nako e Asfloral Haxhiu të zgjedhur në Fier. Nga të zgjedhurit e Partisë Demokratike në takim ishin Besart Xhaferi i Tiranës, Igli Cara e Manjola Luku të Durrësit. Ndërkohë, nga partitë e reja ishte i pranishëm në takimin me përfaqësuesit amerikanë deputeti i ri, Erald Kapri, i zgjedhur nga Partia Mundësia.