Që prej ditës ku nisi procesi i vettingut e deri më tani, janë shkarkuar shumë prokurorë e gjyqtarë. Ka pasur edhe shumë të tjerë që kanë vendosur të dorëhiqen nga sistemi pikërisht për shkak të frikës së të dy shkallëve të rivlerësimit. Gropa e mbetur hapur në sistem do të plotësohet nga të tjerë, që pritet të bëhen pjesë. Në këtë kuadër, 60 është numri i gjyqtarëve dhe prokurorëve të rinj, të cilët do të pranohen në shkollën e magjistraturës për vitin akademik 2021-2022. Numri më i lartë do të jetë për gjyqtarë 35, ndërsa prokurorë janë caktuar nga Këshilli i Lartë i Prokurorisë 25. Afati i aplikimit për 60 vakancat e shpallura nga KLGJ dhe KLP do të jetë deri më 29 shkurt 2020 dhe më pas ata që pranohen do të ndjekin studimet dhe përpara emërimit në përfundim të shkollës, do t'i nënshtrohen Vettingut. Aktualisht në sistemin e drejtësisë përfshi gjyqtar e prokuror ka mbi 100 vakanca për shkak të shkarkimeve nga vettingu dhe dorëheqjeve.