Një trafikant nga Patosi që kishte menduar t’i shpëtonte Drejtësisë Italiane me çdo mënyrë është arrestuar nga Policia gjatë operacionit policor të koduar "PRIMO", operacion që është ndërmarrë për kapjen e personave të shpallur në kërkim ndërkombëtar. Ky aksion policie është kryer nga Seksioni për Hetimin e Narkotikëve në DVP Fier, Interpol Tirana dhe zyra ndërlidhëse Interforza. Kësisoj, është vënë në prangat e Policisë 31-vjeçari nga Patosi, për veprën penale "Pjesëmarrje në grup kriminal, me qëllim trafikimin e lëndëve narkotike”. Në vijim të punës për kapjen e personave në kërkim dhe si rezultat i shkëmbimit të vazhdueshëm të informacioneve mes ZQK Interpol Tirana, Drejtorisë Vendore të Policisë Fier dhe zyrës ndërlidhëse Interforza, u bë i mundur finalizimi i operacionit të koduar "PRIMO". Si rezultat i operacionit, në qytetin e Patosit, u bë i mundur lokalizimi, kapja dhe arrestimi i shtetasit I. S., 31 vjeç, banues në Patos.