I shpallur në kërkim kombëtar dhe ndërkombëtar prej disa muajsh, Gjet Daci, 34 vjec ra në prangat e policisë së Matit këtë të premte. I shpallur në kërkim nën akuzën e “Prodhimit dhe shitjes së narkotikëve" si dhe "Mbajtjes pa leje dhe prodhimit të armëve shpërthyese dhe të municionit", 34 vjecari u arrestua në flagrancë në aksin rrugor Laç-Mamurras, pas informacioneve të marra në rrugë operative. Referuar njoftimit zyrtar të policisë, Daci ishte shpallur në kërkim pasi me datë 12 tetor të vitit 2021, gjatë kontrollit të ushtruar nga shërbimet e Policisë në banesën e tij, iu gjet dhe iu sekuestrua një sasi lënde narkotike canabis sativa dhe një armë zjarri automatik. Gjykata e Rrethit Mat ndaj këtij shtetasi ka vendosur masën e sigurisë 'Arrest me burg', për veprat penale “Prodhimi dhe shitja e narkotikëve" si dhe "Mbajtja pa leje dhe prodhimi i armëve shpërthyese dhe municionit”. Materialet i kaluan Prokurorisë për veprime të mëtejshme hetimore.